नागपूर (मवृसे) राज्यातील काही भागांमध्ये करोनाचा विळखा फारसा चिंताजनक नसल्याने ग्रीन झोनमधील काही जिल्ह्यांना लॉकडाऊनमधून अंशत: शिथिलता मिळण्याचे शुभसंकेत मिळत आहेत. मात्र शहरातील एकाच व्यक्तीच्या निकट सहवासात आलेल्यांना करोनाचा विळखा विस्तारलाच जात आहे. त्यामुळे नागपूरसमोर रोज नवनव्या साखळदंडाचा पाश आवळला जात आहे. शहरात मंगळवारी पॉझिटिव्ह आढळलेल्या नऊ कोरोना बाधितांमुळे हा विळखा आणखी घट्ट झाला. त्यामुळे नागपुरातील करोनाबाधितांची संख्या आता ८९ वर पोहचली आहे. इंदिरा गांधी शासकीय वैद्यकीय महाविद्यालय व रुग्णालयाच्या (मेयो) विषाणू प्रयोगशाळेत आज सात नमुन्यांमध्ये करोना विषाणू आढळून आला. त्यात ३१, २१, १७, ३०, ६५, ७० असे वय असलेले रुग्ण आहेत. पाच महिला व दोन पुरुषांचा त्यात समावेश आहे.
मेयोच्या प्रयोगशाळेने तपासलेल्या या नमुन्यांमध्ये करोनाचे निदान झालेल्या सर्वच पॉझिटिव्ह व्यक्ती या सतरंजीपुरा येथील करोनाबाधिताच्या कुटुंबातील व्यक्तींच्या सहवासात आलेल्यांपैकी साखळीतील आहेत. त्यामुळे या एकट्या व्यक्तीमुळे करोनाचा प्रादुर्भाव झालेल्यांचा नागपुरातील आकडाही आता ५४ वर गेला आहे. शासकीय वैद्यकीय महाविद्यालय व रुग्णालयाच्या (मेडिकल) विषाणू प्रयोगशाळेने केलेल्या तपासणीत सोमवारी मध्यरात्री एका ६६ वर्षीय ज्येष्ठाचा अहवाल पॉझिटिव्ह आला.
