हैदराबाद (मवृसे)गेल्या काही दिवासांपासून भारतात करोना रुग्णांची संख्या वाढत चालली आहे. करोनाची लागण रोखण्यासाठी पंतप्रधान मोदींनी २१ दिवसांचा लॉकडाऊन जाहीर केला आहे. करोना व्हायरसविरुद्ध लढण्यासाठी सर्वांना घरी राहण्याचे आवाहन करणारी भारताची ऑलिम्पिक पदक विजेती बॅडमिंटनपटू पीव्ही सिंधूने राज्य सरकारांना १० लाख रुपयांची मदत केली आहे.सिंधूने आंध्र प्रदेश आणि तेलंगणा राज्य सरकारांना प्रत्येकी ५ लाख रुपयांची मदत केली आहे. तिने ही रक्कम मुख्यमंत्री मदत निधीत दिली आहे. ही रक्कम करोना व्हायरसविरुद्धसाठी दिल्याचे तिने सोशल मीडियावरून सांगितले. करोना व्हायरसविरुद्ध लढण्यासाठी अनेक खेळाडू सोशल मीडियावरून लोकांना आवाहन केले आहेत. पण काही खेळाडू आहे ते फक्त आवाहन न करता आर्थिक स्वरुपात मदत करत आहेत.
सिंधूच्या आधी दक्षिणेतील सुपरस्टार पवन कल्याण याने दोन कोटी रुपयांची मदत केली होती. त्याने आंध्र आणि तेलंगणा राज्य सरकारांना प्रत्येकी ५० लाख तर केंद्र सरकारला १ कोटींची मदत दिली होती. भारताचा कुस्तीपटू बजरंग पुनिया याने त्याचा सहा महिन्यांचा पगार हरियाणाच्या मुख्यमंत्री निधीत देण्याचे जाहीर केले आहे. भारताचा क्रिकेटपटू आणि भाजपचा खासदार गौतम गंभीरने ५० लाखांची मदत केली आहे. बीसीसीआयचे अध्यक्ष सौरव गांगुली लॉकडाऊनमधील वंचितांना ५० लाख रुपयांचे तांदूळ वाटणार आहे. सुरक्षेच्या कारणास्तव काही लोकांना बंगालमध्ये शाळेत ठेवण्यात आले आहे. या लोकांना गांगुलीने मदत करायचे ठरवले आहे.
गांगुलीने लाल बाबा चावल या कंपनीबरोबर ही गोष्ट करायचे ठरवले असून त्यासाठी गांगुली ५० लाख रुपयांची मदत करणार आहे. भारताची टेनिसपटू सानिया मिर्झाने देखील मदतीचा हात पुढे केला आहे. प्रत्येक रोजंदारी कामगाराला सानिया आपल्या चळवळीच्या माध्यमातून दोन किलो तांदूळ, दोन किलो गव्हाचे पीठ, दोन किलो डाळी, अर्धा किलो साखर, ५०० मिली. तेल, १०० ग्रॅम चहा पावडर, एक किलो मीठ आणि दोन साबण, असे पॅकेट तिने बनवले असून रोजंदारीवर असलेल्या कामगारांना ती देत आहे. करोनाग्रस्तांसाठी बांगलादेशच्या क्रिकेटपटूंनी आपला पगार सरकार देणार असल्याचे जाहीर केले आहे. आपला एका महिन्याचा अर्धा पगार बांगलादेशचे २७ खेळाडू सरकारला करोनाग्रस्तांसाठी देणार आहेत. श्रीलंकेच्या क्रिकेट बोर्डाने तेथील सरकारला एक कोटी रुपयांची मदत केली आहे.
