मुंबई दि. १८ । करोनाग्रस्तांची संख्या भारतात झपाट्याने वाढत आहे. त्यामुळे गुंतवणूकदार घाबरले असून भांडवली बाजारात विक्रीचा सपाटा सुरूच आहे. आज सेन्सेक्स १७०९ अंकांनी कोसळला. आजच्या सत्रात गुंतवणूकदारांचे किमान पाच लाख कोटींचे नुकसान झाले आहे. आज बुधवारी मुंबई शेअर बाजाराचा सेन्सेक्स १७०९ अंकांनी कोसळला आणि २८८६९ अंकांवर स्थिरावला. राष्ट्रीय शेअर बाजाराच्या निफ्टीत ४९८ अंकांची घसरण झाली. निफ्टी ८४६८ अंकांवर बंद झाला. आजच्या घसरणीनंतर तीन वर्षात प्रथमच सेन्सेक्स २९ हजार अंकांखाली आला आहे. यापूर्वी सेन्सेक्स जानेवारी २०१७ मध्ये २९ हजार अंकाखाली आला होता.
निफ्टी ८५०० अंकांच्या पातळीखाली गेला होता. करोनाच्या प्रादुर्भाव रोखण्यासाठी विविध राज्य सरकारांनी ३१ मार्चपर्यंत बाजारपेठा, सिनेमागृहे, देवस्थाने, हॉटेल्स आणि गर्दीची ठिकाणे बंद ठेवण्याचा निर्णय घेतला आहे. यामुळे अर्थव्यवस्था जवळपास ठप्प झाली असून त्याचा फटका कंपन्यांना बसत आहे. बाजारातील मागणी कमी झाली असून वस्तूंचे भाव कोसळत आहेत. याचे भविष्यातील अंदाज बांधून जागतिक संस्था विकासदराचा अंदाज कमी करत आहेत.
या सर्वांचे परिणाम भांडवली बाजारावर होत आहेत. बाजारातील करोनाचे नकारात्मक वातावरण पिच्छा सोडत नसल्याने गुंतवणूकदार हवालदील झाले आहेत. राष्ट्रीय शेअर बाजाराच्या मंचावर आज २४८ शेअरने वर्षभराचा नीचांकी स्तर गाठला. आज इंडसइंड बँकेच्या शेअरमध्ये २४ टक्क्यांनी घसरण झाली. बँकेचा शेअर सहा वर्षांच्या नीचांकी स्तराला गेला आहे. भांडवली बाजारातील अनिश्चिततेच्या पोर्शभूमीवर परदेशी संस्थामक गुंतवणूकदारांनी ३८ हजार १८८ कोटींची विक्री केली आहे.
